Кеше Елордамызда Президентіміз Н.Ә. Назарбаевтың қатысуымен Жастар жылының ашылу салтанаты өтті.
Сол ауқымды іс-шарада біздің «Жұлдызым» бағдарламасының кейіпкері, жас өнертапқыш Абзал Мырзаш Елбасының алдында сөз сөйлеп, өзінің екі ірі жобасын таныстырды.
Алғашқысы - әлемнің кез келген жерінен компьютердің стандартты ағылшын пернетақтасын (клавиатурасын) пайдаланып, қазақша жазуға мүмкіндік беретін қазақ-латын әліпбиі болса, екіншісі - кириллицадан латын қарпіне аударатын конвертер бағдарлама.
Бұл бағдарлама арқылы кириллицадан латын графикасына 1 минутта 1200-ден астам кітап аударуға болады екен.
13 жасар Абзал қазір Қазақ-Британ техникалық университеті ақпараттық технологиялар факультетінің 2 курс студенті. Кейіпкеріміз «Болашақта АҚШ-тағы Массачусетс технология институтының магистратурасына оқуға түсіп, ақпараттық технология саласы мен нанотехнология саласын жетік меңгеріп, Қазақстанға оралып, елімнің ғылым саласына үлесімді қосамын», - дейді.
«Жұлдызым» бағдарламасына берген сұхбаттың толық нұсқасын сайтымыздан тамашалай аласыңдар.
