Биыл «Мектепке жол» акциясы аясында 8 мыңға жуық елордалық оқушыға әлеуметтік көмек көрсетілді

Астанада жыл сайын 1 тамыздан 30 қыркүйекке дейін «Мектепке жол» республикалық акциясы өтеді. Астана қаласы Білім басқармасының хабарлауынша, биылғы акция аясында №13, 45, 55 мектептерде халыққа консультативтік көмек көрсететін қоғамдық қабылдаулар жұмыс істеді. Шара барысында 82-ге жуық елорда тұрғыны көмекке жүгінген.

Астана қаласының Кәсіпкерлік және өнеркәсіп басқармасының ұйымдастыруымен тамыз айында оқу жылы қарсаңында орталық алаңда мектеп жәрмеңкесі өтті.  Онда Астана, Алматы және Қарағанды өңірлерінің 30 шақты кәсіпкерлері мен тауар өндірушілерінің қатысуымен мектеп формасы, оқуға қажетті құрал-жабдықтар, оқулықтар нарықтағы бағадан арзандатылып сатылды.

Шара барысында аз қамтылған және көп балалы отбасылардан шыққан 8 727 балаға жалпы сомаcы 92 миллион 156 мың теңге  болатын көмек көрсетілді.

Айта кетейік, былтырғы жылы «Мектепке жол» акция барысында 68506,2 мың теңге көлемінде 7 667 балаға көмек көрсетілген. Жыл сайынғы шараның мақсаты – жетім, ата-анасының қамқорлығынсыз қалған балаларға, тұрмысы төмен және көпбалалы отбасылардан шыққан балаларға қолдау көрсету, оларға қоғамның қамқорлығын сезінуге мүмкіндік беру.

astana.kz